خلال الساعات الماضية تصدرت أنوسة كوتة، حديث منصات التواصل الاجتماعي، بواقعة تعدى فيها نمر على أحد العاملين في السيرك واتسبب في قطع يده، ليخرج شقيقها قبل ساعات معتبراً العامل يستغل الواقعة ليتصدر التريند وسط موجة غضب واسعة بين الجمهور.

شقيق أنوسة كوتة يستفز الجمهور

 وقال شقيق أنوسة كوتة موجهاً حديثه لعامل السيرك، علي البسطاويسي: "مبروك الترند يا بسطاويسي! كنت هتسبب في كارثة وتعرض المدربة والجمهور كله للخطر علشان تتمنظر! أنت تقول إن الحيوانات دي مكلتش من 10 رمضان، يعني من 25 يوم، طيب إزاي المفروض يأكلوا إيدك وإنت برا القفص مش المدربة اللي جوه؟ أنت بتستفز الحيوانات اللي متعرفكش، مستني منهم إيه؟".

 وأضاف: "من غير المنطقي أن تقول إن المدربة لم تهتم بك، رغم إنها هي من اصطحبتك للمستشفى فور إصابتك وهي بملابس العمل. وبعدين، هي قعدت في النيابة 8 أو 10 ساعات تحاول تحميك وتحمي الجمهور، وبلغت أهلها عشان يكونوا معاك. فهل منطقي إنها راحت النيابة علشان تهملك؟".

وتابع: "الكاميرات هتبين لك إزاي أنوسة واجهت النمر لما هجم عليك، وشوف في كام أسد كان على الأرض وهي مدياهم ضهرها! كانت ممكن تضيع في ثانية! دخول عم شعبان القفص كان كارثة تانية، لأنها كانت مسؤولة عن 3 حاجات في نفس الوقت: فك النمر اللي هجم عليك، حماية عم شعبان، والتأكد من إن أي حيوان مش هيهرب من القفص. إحنا لازم نفرغ الكاميرات لأن مهم الكل يعرف الحقيقة!".

 والد عامل السيرك يرد

 من جانبه رد والد عامل السيرك على تصريحات شقيق أنوسة كوتة قائلاً إن ابنه  كان يعمل مع أنوسة منذ 11 عامًا، ولديه خبرة كبيرة في التعامل مع الحيوانات المفترسة، جعلته مؤهلاً  لربط الأسود أثناء العروض واستنكر تصريحات شقيق مدربة الأسود والنمور قائلاً: "كيف يقولون إنه كان يبحث عن التريند؟ لقد كان يبحث عن لقمة عيشه".

واعتبر والد عامل السيرك، علي محمد البسطاويسي،  أن أنوسة كوتة فضلت سلامة النمر الذي تبلغ قيمته مليون جنيه على حياة ابنه، منتقداً تجاهلها زيارة ابنه أو الاطمئنان عليه.

 تفاصيل واقعة اعتداء نمر أنوسة كوتة على عامل في السيرك

وعن تفاصيل الواقعة، أوضحت أنوسة كوتة أن النمر التهم يد أحد العمال المساعدين  الذي كان يقف خارج القفص، وأنه بتدخلات من المدربين والمساعدين تم إنقاذه، بعد أن أبعدوا النمر عنه.

وأرجعت أنوسة كوتة ما حدث إلى أنه "خطأ فني"  قائلة: "لو كان حد المفروض يحصل له حاجة فهو أنا، فأنا من كنت موجودة داخل القفص، والمُساعد كان خارج القفص وأيده دخلت للقفص وهو ده الخطأ الفني والإداري اللي لازم نحاسب المسؤول عنه".

محامي أنوسة كوتة يرد

 وفي ظل الاتهامات الجماهيرية التي تطول أنوسة كوتة، بأن العمل في السيرك يتطلب تجويع الأسود والنمور، والتعامل مع الحيوانات بطريقة غير آدمية، قال محامي مدربة الأسود والنمور الشهيرة: "مليون سلامة لكل العاملين بسيرك طنطا بقيادة الأستاذة انوسه كوته التى استطاعت بثباتها وخبرتها ان تسيطر على الموقف ومليون سلامة على محمد البسطويسي.. وردا على ما تم ترديده من عدم إطعام الأسود والنمور لمدة عشرة أيام نبين لحضراتكم الرد من الجهات المختصة الذي يثبت عكس ذلك"

وأضاف: "سوف تصدر  الأستاذة انوسه كوته بيان توضيحياً للواقعة وملابساتها بعد الانتهاء من التحقيقات والأيام القادمة سنكشف كافة التفاصيل ونرجو عدم الانسياق وراء موجة ركوب التريند سلم الله الجميع مع تحياتي المستشار نزيه على مسعود المحامى ووكيل الأستاذة انوسه كوتة".

 كما دافع عنها أحد العاملين معها في تعليق كتب فيه: "الأسود والنمور في البراري تقدر تعيش أسبوعين من غير طعام؛ إنما في السيرك أنا شاهد بنفسي أن بعد كل عرض الأسود والنمور بتاكل واجباتها ده غير الفيتامينات والرعاية البيطرية وحب واهتمام المدربين لهم .. الناس اللي بتهاجم السيرك عن جهالة ولو محمد بسطويسي هو اللي خالف نظام السيرك يبقى ايه ذنب گابتن أنوسة!؟ اتقوا الله".

 عامل في سيرك أنوسة كوتة يكشف مفاجأة

 وفي المقابل كتب عامل في سيرك أنوسة كوتة سابقاً مدافعاً عن الاتهامات التي تلاحق علي بسطاويسي بعد قطع ذراعه برغبته في تصدر التريند وأنه تسبب في هجوم النمر عليه: "انا كنت شغال في سيرك انوسه كوته اللي في العين السخنة وصاحب محمد البسطويسي أعرفه معرفة شخصية واشتغلت معاه كذا مرة والغلط مش من محمد ده إهمال من المدربة وهي فعلا بتربط النمور في كل عرض ولازم المدربة تبص للنمر قبل ما يطلع يقعد مكانو وهي معملتش كده وبيجوعو النمور فعلا بيقعدو أكثر من أسبوع مش بيكلوهم".

 وأضاف: "عندي استعداد اطلع فى فيديو واحكي كل دهه واشتغلت في سيركات كتير واعرف حاجات الشخص العادي ميعرفهاش ومحمد لو فنان او آرتيست، وبيقدم عروض فالسيرك وحصل معاه كده محدش هيسكت ويدخل مستشفى خاصة، لكن محمد عشان عامل غلبان زيي وزى أخوات ليا في المهنة مش يفكر في أصلا عشان احنا غلابه وملناش سلطه زي الناس دي الدنيا مش بتيجى غير ع الغلبان اتمنى تعليقي يظهر لكل الناس عشان ارجع حق الغلبان اللى هيفضل يعانى لحد اخر يوم فى حياتو وشكرا".