رد سامح حسين على الانتقادات التي طالته بسبب تصريحاته حول إلغاء الإجازات الرسمية، والتي تسببت في موجة غضب كبيرة بين الجمهور.

رد سامح حسين

 وكتب سامح حسين في رده على الانتقادات: "جمهوري الحبيب.. كل سنة وأنتم طيبين وبخير.. بناء على طلبكم.. والناس اللي طلبت تفسير لموضوع إني بطالب بإلغاء الإجازات في الأعياد.. الكلام ده طبعا غير حقيقي بالمرة .. أنا زيكم بحب الإجازة وبحب زيكم اشتغل بإخلاص زي كل واحد في مجاله.. الإجازة دي نعمة من ربنا نشحن من خلالها قوتنا لمواصلة مشوار الحياة .. كل الموضوع إني اتمنيت إن أعياد مصر وأفراحها تزيد وتكتر وساعتها مش لازم ناخد الأعياد الجديدة دي كلها إجازة.. لكني لم أقصد أبدا إلغاء الإجازات الرسمية.. وعلي فكرة إحنا بنحب الإجازة علشان بنشتغل.. أي حد جرب قلة الشغل مش هيحب الإجازة.. الشغل نعمة ربنا يديمها علينا ويعين كل واحد على حاله ويكرمنا جميعا ويرزقنا الخير .. يا رب حياتكم تكون كلها أعياد وفرحة".

تباينت ردود الأفعال حول تصريحات سامح حسين، فبينما اعتبر البعض أنه بالغ في الأمر، دافع عنه آخرون معتبرين أنه كان يتحدث بحسن نية.

 وكتب متابعون في تعليقاتهم: "يعني ايه أعياد مصر وأفراحها تكتر ومش لازم الأعياد الجديدة ناخدها إجازات.. زي ايه نقدر نطبقه علي أرض الواقع يعني من غير ما نفقد الشغف بكلمة عيد؟ ما علينا علشان مندخلش فتفاصيل كتير.. بس احنا للأسف لو مأفورناش منرتحش يحصلنا حاجة.. يعني مثلا لو حد شخصية عامة عمل موقف نبيل ومحترم مينفعش يتجنب الظهور شوية لكثرة الاخطاء اللي ممكن تشوه موقفه النبيل! لعلها نصيحة لنا جميعا".

 كما جاء في التعليقات: "الناس ترعب حقيقي فجأة تعليك وفجأة تخسف بيك الأرض طب هل بنمشي، ورا التريند بدون ما نشوف الحقيقة حتى ولا قلوبنا بقت وحشة لدرجة أننا نحارب الحد بعد ما بنشوفه نجح بسببنا ف نقول ايه ده واحنا ليه مش كده". "لا يا سامح أنت خانك التعبير الإجازات دي معظمنا بنشتغلها بأجر إضافي يعني بتعين ع مشاق الحياة فلما حضرتك تطلب انها تتلقى فده  شيء غلط ومجحف لأنك أنت بتيجي علي قوت الغلابة وعرقهم".

 ونصح آخرون سامح حسين في تعليقات منها: "كلنا دعمناك بقوة وحب وبرده مستمرين … بس كل ما القاعدة الكبيرة والدائرة بتكبر .. نركز في كل كلمة بتتقال حتى لو من باب الهزار الضحك او كلمة مش مفهومةركز تعبيرك خانك … علشان الناس مش هترحم من الآخر … ركز ومتخليش حد يخدك اتجاه تاني علي حساب نفسك وحساب حب الناس ليك ..، خليك طبيعي وبس مش مطلوب منك أكتر من كده خليك وسط الناس وبس … دي نصيحه".

 فيما دافع آخرون عن سامح حسين في تعليقات منها: "أنا كنت من ضمن الحضور في الاحتفال، وكلنا عارفين إن اللي قاله سامح حسين كان هزار واضح، ومش منطقي يتم اجتزاء الكلام بالشكل ده عشان يتعرض للهجوم! الراجل كان بيتكلم بكل احترام، واللي شدني أكتر ودفعني أكتب هو موقفه المشرف في دعم القضية الفلسطينية قدام الجميع، وده في حد ذاته يستحق التقدير والاحترام بدل ما يتم الهجوم عليه بسبب جملة اتقالت في سياق هزار.".

ووجه متابعون لسامح حسين نصائح أخرى من بينها: "سيبك من أي حاجه بتقولها دلوقتي أنا واحد من الناس بحبك نصيحه لوجه الله إنته وصلت لمرحله أي واحد في الدنيا كان يتمناها دخلت قلوب الناس كلها في فتره مكنتش تحلم بيها فلازم تحافظ على المرحله دي من إيه بقي سيبك من الرؤساء والناس ال كل شويه بتكرمك والممثلين ال بيرفعولك بوستات دي فيها ناس كتير مش قلبها عليك خاف على نفسك وعلى آل وصلت ليه مش اي حد بيوصل للي انته فيه.

 وكان سامح حسين تصدر التريند ببرنامج قطايف، وخلال الساعات الماضية شارك في احتفالية حضرها الرئيس المصري عبدالفتاح السيسي، وفي كلمته، اقترح سامح حسين إلغاء الإجازات الرسمية، وهو ما تسبب في موجة غضب واسعة بين الجمهور إلا أنه عاد وأوضح مقصده.